• Müsəlman
  • Jurnalistlərin
  • Səsi

Smart-kartlara ödəniş terminallarında əlavə 10 manat vəsaitin hədiyyə edilməsi ilə bağlı yanlış məlumatlar paylaşıldı

Dünən gecə saatlarından bəzi sosial şəbəkə istifadəçiləri smart-kartlara ödəniş terminallarında əlavə 10 manat vəsaitin hədiyyə edilməsi ilə bağlı yanlış məlumatlar paylaşmış, səs yazıları, elanlar yerləşdirmişlər.

Məlumatda deyilir: "Azəriqaz" İstehsalat Birliyi olaraq bəyan edirik ki, belə məlumatlara aldanmayın və aşağıdakı şərhimizə diqqətlə yanaşın. Ümumiyyətlə, smart-kartın bərpası deyilən bir xidmət mövcuddur. Yəni, sosial şəbəkələrdə bu barədə yayılan videomaterialda da həmin proses tam düzgün izah olunur. Smart-kart necə bərpa olunursa ondan danışılır. Abonent, məsələn, 10 manat vəsait yüklədi. Bu zaman kartı terminaldan tez götürərkən və ya həmin anda internet ötürücülərdə problem yaranarsa, vəsait karta yüklənməyə bilər. Amma ödəniş ödəmə qəbzində əksini tapır. Bir anda abonent vəsaitin yükləndiyini başa düşür və gəlib kartdakı məbləği sayğaca yükləyəndə sıfır göstəricisi göstərir. Bu halda məsləhət görülür ki, smart-kart təkrar aparılmalıdır ödəniş terminalına və menyuda "Smart-kartın bərpası" seçilməklə əvvəlki məbləğ yenidən yüklənilməlidir. Yəni, proses bu qədər sadədir. Lakin kimlərsə bunu tamam başqa məqsədlərə yönəldir. Dünən gecə saatlarından etibarən belə bir ajiotaj yaradıldı ki, ödəniş terminallarında "Smart-kartın bərpası" düyməsini klikləməklə kartlara əlavə 10 manat da yükləmək mümkündür. Bəziləri bunu "Azəriqaz" İB-nin vətəndaşlara "hədiyyəsi" kimi də qələmə vermişdir. Birliyin sosial şəbəkələrdə apardığı monitorinq zamanı da müşahidə edildi ki, bəzi marketlərdəki ödəmə terminalları qarşısında gecə saatlarında hətta növbələr də yaranmışdır.

Bildirmək istərdik ki, bu yanlış əməliyyat abonentlərin smart-kartlarında ciddi qüsur yarada bilər. Çünki hər ödəmə bir vahid kod üzərində icra olunur və təkrarsızdır. Yəni, kartı ödəmə terminalına zərurət olmadığı halda daxil edib "Smart-kartın bərpası" düyməsini klikləyib əməliyyatı həyata keçirmək yalnız həmin kartın sıradan çıxmasına gətirib çıxara bilər. Belə olan halda kartda yaranan qüsurlara görə yeni məbləğ yükləniləndə problemlər yaranacaq və bundan başqa, abonentlər kartlarının əvvəlki qaydada işləkliyini təmin etmək üçün "ASAN xidmət", "ASAN Kommunal" və İstehsalat Birliyinin xidmət sahələrinə üz tutmalı olacaqlar. Bu zaman onların həm vaxt itkisi ilə üzləşməsi, həm də müəyyən müddətə qazsız qalması qaçılmazdır”.